رجاء الى حَسنه ملص

السيمر / السبت 08 . 04 . 2017

عمار الحر

ياحسنه ما تحكمينه؟
موجرّبنه كل زبايل الدنيا
كلهم أوجَروا بينا
جربنا البعث وأيامه المخبلات
حروب ومذلة وأعدامات
طويناها صفحته وحرگناهن سنينه
ويوم السقط !! چلاب الكون كلهن
هدهن علينه
وجربنا الاسلامي وطلع چذاب
جربنا ياحسنه ابو لحية وطلع بواگ
يبني قصور بأسم حسين والعباس
وبدمعة التمساح وگدر قيمه
يضحك علينه
ودينه مثل گلادة حْديثَة
دينه ياحسنه لابِسَه زينه
وجربنا اهل العلم والتنوير
وعالِمهُم طلع من كلية التزوير
وخيّرهم يا حسنه بنعجة
ما تسرحينه
يا حسنة د گومي أحكمينه
يشرّفهم يا حسنه ذاك البرجلچ
تلبسينه
ونّستي الشعب.. يوم الشرف من الفگر
بَعتيه
بس ساسة هل البلد من باعوا شرفهم
كفّروا هذا الشعب بْمذهبه ودينه
باگونه أولاد الاصل من الخضراء للمحراب
بلكي أنت ياحسنه التنصفينه
يا حسنه ماتحكمينه؟

نعالچ يا حسنه يشرّف الساسة
أولّهم أبن صبحة وأخرهم عديلة
نعال
وبنصهم من هل مال حمل جمال
واحد حافي من الشرف
واحد حافي من فلوس واحد حافي
من نعال
نعالچ ياحسنه يشرف عمايم
قبلة بالتحاصص والشعب
مثل المطي بس للچذب حمال
نعالچ يا حسنة يشرف اليسكت
على الباگوه
وماينتفض ضد جوگة الأنذال
وبحلگ البرلمان يخلّي الف نْعال
إذا ضلّت وزيرتنا عديلة نعال
يا حسنة لا تخذلينه
باچر رشّحي وياهم
وإذا تاريخهم كتبوا بدم الغير
تاریخچ بدمچ كتبتينه
تاریخچ حزب يا ما صال وجال
ياحسنه كومي رشحينه
خلّي الشعب ينتخبوه وكل حاسد
تنفگس عينيه
وإذا فد يوم منچ طلعت العوجة
نگول العتب ما هو علیچ
الخلل چان الخلل بينا
انتخبنا مومس وعاهر
وبيها الخير ظننينا
بعد ما.. من أهل الشرف والدين شَطّفنا
ايدينا
يا حسنة د گومی احكمينه
بعد ما نخصر احنا هواي
ويه الناضل وجاهد وصلّى الّيل
ومن الدمع غرگ بطاطينه
خسرنا الوطن والعمر وسنينه
شما نخسر احنا ویاچ
يبقى العنب بالسلات وتبقى عامرة
التينة
ياحسنة كتلنه
اليأس من كلمن ساس
وانت أخر أمل لينا
ياحسنة گومی أحكمينه؟

* هذه القصيدة تستثني كل الشرفاء في الوطن ومن كل الاطراف والاطياف.