السيمر موقع عراقي مستقل
متابعة جريدة السيمر الإخبارية / الخميس 28 . 04 . 2016
بقلم الحجية حسنة…
بي بي الله يكَويكَ ويساعدك على ها الظيم الي تشوفه هل ايام
انوبه اندارت السالفة عليك وانت لا يمها ولا بكَرباها.بس هي هاي الايام يكَولون اهلنا دوام الحال من المحال. وجنها الدنيا اندارت عنك .
وانت بعد بيتي هم ما قصرت وياها واشوف كون تعوفها الهم تره الشغلة صارت منفوسة.
ومن عابت هيج برلمان جايف. كلها اخريه حشا السامع ما بيهم الزين
وين الزين ما مش زين وين الزين وين اليدك صدره ويوفي عنه الدين. اشو كلها لكَامة وما عتها مخافة الله واحدهم بساع يكَلب على صاحبة
برلمانك يا بي بي لكينه حرمله والشمر والحجاج كَاعدين بيه ودورنه شكثر بس ما لكينه احسين
لكينه اثار وحشي وغدر ابو سفيان ولا صادفنه حمزه اليكص عيب البين.
وكل هذا وانت مجلب بيه شنو قحط ماكو غيره شوفلك فد وزاره وجلب بيها
وبلكت الي يجي بعدك يوفي بيها.بس هم يلتفون عليه السيبندية والشلايتيه وخربوه علينا
بس احنا متعودين دنيا وقضيناها قهر واحدنآ من حزنه انكسر
اشبيك ياعراقنا صرت من وراهم صعب شو بشر مايرحم بشر
الناس متغيرة ونحس اليوم أصعب من أمس لا تظاهرات وياك تفيد وحتى اعتصامات.
شو طال ليلك ياحزن ياخوفي من ورا برلمانك ماتطلع شمس ونتيه بالليل
الدمع خلصناه والصبر مليناه والثوب الاسود ما ذبيناه وانتم واحدكم يتكاتل عل الكراسي ولا هامته الناس
مانريد رحمة بشر ماعدنا غير الله ماعدنا غيــــــــــــــــر الله
أيامنا خلصت تعب وأحلامنا ماتت غصب ياربي بس بيك الأمل دلينا ضيعنا الدرب
قلوبنا بيها ألم وحسرة منكم . والظلم كل واحد بنفسه التهى والطيبة صارت بس اسم
والبلد ظيعته هل الملة الزفرة.
سلمها الهم وابوك الله يرحمه.
الحرة حدث
