العراق بلد الكلاوات والچذب المصفط

العراقي يؤمن بالمثل الي يگول الي ياخذ امي ايصير عمي, يعني مؤمن صدگ مو سوالف گهاوي , جابو الملك مسلفن من الخارج…صار ملكنا المفدى ورمز الطيبه والعداله حتى لو كل الشعب حفاي ,اجه عبد الكريم , صار الزعيم الخالد وصديق الفقراء (واني منهم ) اجه البعث بانقلاب دموي , صار كلامه وطني وبس هو وبس , اجه صدام بعد ان ذبح ربعه كلهم ودفنهم بقاعة الخلد صار الاب القائد وخوش زلمه وحكمه شرعي ههههههه حسب حارث الضاري. يعني مو مهم شلون وصلت المهم وصلت.

والعراقي ايضا يكره الماضي اذا كان مؤلم ويذكره ابجامته المسرده البازه ومايحب يحچي بيه بل احيانا يرفضه تماما وبعد التطور التكنلوجي صار يلغي الماضي ويقلب بالحقائق كيفما يشاء وشعاره منو يقرا منو يكتب, يمعوووود , يعني من جان مالاگي ياكل لفة گص, نساهه ومن چان راتبه دولارين وهو استاذ جامعي ..فترة وانتهت.

يكبر وينسه تعب امه وابوه ويركلهم للشارع لعیون مرته ولخاطر كرشهه المهوطل , واحنه نريده يفكر بموضوعيه وانصاف, هو طفولته ومراهقته وشبابه من چان عاله على اهله نساهه انريده يذكر تاريح الشعب ههههههه والله بطرانين.

بعد كمية الكذب التي روجت بالاعلام خلال سنين النت , نترست بطن العراقي بالكذب والتهويل وبعده ملّ لكن بدل مايبحث عن الحقيقة ويعرفه … سد مخه بجص ومايريد يسمع بعد اي شي, مو لانه غير منصف وجاحد بل لانه باختصار ماله خلگ بعد هي كله كلاوااااااااااااات وكله يك حساب وشبعني اليوم وجوعني باجر وهنيالك يافاعل الخير.

هسه تمخضت سنين العسر والطلق المتعسر 17 سنه عن ولادة حكومه من معطف برهم صالح ( الذي انسحب من المشهد بهدوء ) بمواصفات فوول ابشن, قالوا لتصريف الاعمال حتى الانتخابات القادمة بس الواقع ايگول الاخ مصدگ وسايگ على الوضعيه ويشمر قرارات يمنه ويسره لان يدري بس توصل چلب بعد وكله راح تنسه سبب مجيئك الاول ..

يادستور ياقانون يا تصريف اعمال يادماء ياطرف ثالث ياحرق ياخطف كله كلاواااااااات.. فعلا كلاوات لان العراقي كل حياته يگضيههه كلاوات ومن يشتغل يشتغل كلاوات.. ومن يبني يبني كلاوات ويشربت اتشربت بكل شغله يستلمه. هاي هي زبدة القول وانتو بكيفكم.