شعر شعبي / درب اليحبّون

السيمر / الخميس 30 . 03 . 2017

د . إبراهيم الخزعلي

دثرنه المحبه بين الضلوع
ولا فد يوم ..
گلنه شگد نحبكم
لأن حب اللسان ..
هواي مگيول
ولسان القلب وحده اليگلكم
موكل اليگول إحنه نحب الناس
او وكت الشده ما شفنه أثركم
بدرب اللي مشينه
هُوْ درب اليحبون
بدرب اللي مشينه
درب اليضحّون
درب حازم وصارم
وأبو إيمان
سلام البطل أرعب عدوكم
واحنه شما مشينه
بظلمة الليل
زرعنه اسنينه شموع بدربكم
مثل ما گلتوا العقيدة
أقوى من الموت
واعلى من المشانق هو حبكم
حبك يا فهد ..
حب الوطن والناس
حبك يا سلام البطل
أبد والله ما ينقاس
تره ميموت حبكم لا وحقكم
ولد حبنه ..
من چنه احنه ِازغار
وليكبر عل المحبه
ما يخطئ أثركم
ولا يخاف المخاطر ،
والسجن والموت
ولا التشريد والحرمان
ما يبعدنه عنكم
تره كل اللي نذرناه
أقل والله من قطره ابحركم
لأن حبكم شمس الأجيال
ويتغنّى الربيع بذكر اسمكم
ولأن حبكم راية الأحرار
تتباها الورود بعطر اسمكم
تتباها الورود بعطر اسمكم
**********************

16.3.2016
موسكو