السيمر موقع عراقي مستقل
السيمر / فيينا / الاحد 28 . 04 . 2019
حسن المذكور
1 ــ عمو اليوم ما رحت للمدرسه, امي گالت روحي ويه البنات على باب الله, ايه للزباله, باب الله مالنه ينفتح على الزباله, عمو شنسوي مات ابوي بالحرب, هو مجاهد, چان ياخذ راتب, ومن مات تركونه, ما ادري ويامن, صارت هواي جيوس عمو, هاي الورقه البيدي شعر, كتبته امي, من يضيج خلگي اقراهه حتى ابچي, امي اسمهه بدرية وبوي اسمه عبود, ويكولوله ابو چماله, عمو من اقراهه اتذكر ابوي وبچي, لا ولله عمي استحي, بس عمو من ابچي لازم تنتظر, خوش اوگف لي:
2 ـــ چماله تقرأ وجع الأم, تبكي احيانا, ثم تواصل, لنقرأ معها, قد نتعافى من عضال الأحباط, انها المزبلة, ما تبقى لأم چمالة من العراق, حتى هوية مدينتها, لم يبق منها سوى, “چماله عبود ولدت في مدينة الثورة” الثورة يتيمة الزعيم, اغتصبها صدام, واكمل ساديته الصدر, لكنها وكأي مدينة للفقراء, رغم اغتصابها, تبقى لأهلها عذراء, رقعتي صدام والصدر, لا تليق بثوبها الوطني ابداً.
3 ـــ
طفوك شمعه بيا بخت
عبود گلي
ليش يتمت الجهال
ورملتني؟؟؟
…………….
آخ يا سمچة شواطي
بلا گلب
تمشي على ريحة موتهه
مشدوهه ومضيعه الدرب
تنشد شبچ صيادهه
نصادت وما تدري ليش
نباعت وما تدري ليش
بسوگ ذاك الصوب
باعوهه برخص
…………..
يبو چماله شورطك
ذوله هتليه گلتلك
وصدكتهم حاسدينك
هيه لو بيهه حواري
وچم صبي
چان سيدنه ثردهه
وما نشد عبود وينه
……………
عبود لو شفت ابو اليمه
فدوه سلملي عليه
بوس كل معصوم يمه
وبوس اديه
كله بدريه على باب الله
بدرابين الشماته
تبات فوگ خدودهه
دموع البچي
وگله فدوه
بعت نص عمر الجهال (الكلية)
وخايفه
لا ابيع ذاك الينحچي وما ينحچي
والسماحات النشامه
تبيع بينه وتشتري
بس گله لا..وداعتك مابيع لا ..
لو ننكسر ما نشتكي
رافعه الراس بعلو نخلة هلي
………………
عبود هاك دموعي ودموع اليتامه
بچيهه بعيون ابو اليمه
گله صبرك
ما خلص بيه الصبر؟؟؟
ذوله علاسة وطن
وما بگه بيناتهم
ذاك اليشور
………..
هذا يا دين
اليوزع الموت للجوعان قسمه
بسوگ جمعتهه المراجع
باعت چذب.. حتى النبي
يبوگون باسمه
هذا يا مذهب هويته
اشگد ارامل
وفوگهه كومة يتامه
مذهب اهل البيت ؟؟؟
لا ولله حشاهم
ادري ابو اليمه
بعد روحي حچاهه
لو صار جوع الناس زلمه
چا كتلته
……..
عبود يا شيال حملي والدليل
من يچلچل ليلنه
بحزنه الثگيل
شموع طاريك ضوانه
لو عطشنه لشوفتك
نتغرغر ويه الشوگ بسمك
انت بگلوب الجهال
بعمر بدريه
يظل سهران جرحك
آخ يا بو چماله جرحك
ما ينام بليل جرحي
وبيك حيرني السؤال
شدولبك
يتمت عمري
ويتمت بيه الجهال
ورملتني … ورملتني؟؟؟
…………….
4 ـــ
عبود لا.. لا تنهضم
بعد بالديره زلم
بيهه شباب
والحلم ذاك الحلم
بعده عيد بديرتك
وبالگمر بعده الگمر (عبد الكريم)
والشعب لو يلچم
غيضه مثل غيض البحر
….. لا تنهضم
چرغد ام چماله للثاير علم
وترضع الثار انتفاضه
لو طال مشوار الزلم
لا تتعب ولا تنفطم
… لا تنهضم
… لا تنهضم
ـــــــــــــــــــ
28 / 04 / 2019
