السيمر موقع عراقي مستقل
السيمر / الاحد 27 . 01 . 2019
واقع حال العراقيين كما يقول الشاعر…
كالعيس في البيداء يقتلها الضما
والماء فوق ظهورها محمول
….
صدك باجر عيد عمي؟
وليش باجر عيد عمي؟
عيد! …
وبراس السنة
والسنة هم عدها راس؟
أعيون وإيدين ولسان؟
عمي هم عدها عقل؟
وتعرف بحال الفقير؟
وليش تحسبني أجدي؟
بست كل أيد المعامل…
وما حصل عدهم شغل
عمي أصبغلك حذاءك؟
هاك أخذ مني ( كلينكس )
بربع دينار أشتريته
أقبل شيطلع امنيدك…
رزق من الله حلال
عمي لو تعرف بحالي
جان تعذرني وكلت حكك فقير
أمي يا عمي الفجر لبست عبايه
طلعت وكالت عليك أتوكلت..
رب الفقير
أمي ما راحت بعيد…
هناك أمي
شوفها بذيج الزباله
أتلم قواطي فارغه وتترس كواني
وكبل متغيب الشمس…
تتناني غاااااد
آنه أكبر ولد عدها
والولد يا عمي عون
على ظهر أمي وظهري
نشيل كل ذيج الكواني
عمي ما عندي أبو
جان أبويه يشيل كل ذاك الحمل
عمي لو تعرف أشتاكل من تجوع؟
تجمع الصمون من بطن الزباله
وتكسم الصمونه لو تدري يعمي؟
تكسم الصمونه تنطيها الجلب…
تكول أمي…
الله ما يرضه يخلي
جلب ج
ايع بالعراق…
والله ما عندي أبو
جان أبويه يرجع أمتلل شليله
وأمي من تذكر أبويه…
عيونها تغرگ نواعي
تكلي يوليدي أبيّك…
شال رشاشة كرامة…
وفزّع ينصر للعراق
مات أبويه…
وكبرت أكروش الكراسي…
كبرت بدم الشهيد
عمي تسمحلي بسؤال؟
أسمع يكولون لتجدي حرام؟
والله مو آنه اليجدي…
شلون أجدي…
عيب وزنودي شباب
آنه أبيع الماي للعطشان أبيع
والشمس حركتلي وجهي
وأبد ما عفت الشغل
و(ترفكلايت) الشاهد
حافي ما أملك نعال
عمي بس هذا السؤال…
آآآآخر سؤال؟
تكول أمي البرلمان…
قوط، ورباط، وعمايم…
سّن قوانين وكسر ظهر الفقر
شوف يا عمي أنكسر ظهر الفقير..
ومنكسر ظهر الفقر…
عمي تسمحلي نسيت أتذكرت
والعذر لله سؤال …
أنت هم تعرف (علي)
آنه يوميه أنتظر هلبت يمر
أبد ما مرلي (علي)
ولا مسح بيد الله راسي..
كلي وين ألكاه وأزوره
وأشتكيله من الحكومه…
… والفقر
أسمعت من واحد معمم
يحجي عن طيبة (علي)
(علي)…
هم مثل حالي فقير…
وصار ريس…
وجمع كل فقره البلاد…
آنه هم أسمى علي …
ليش لا تضحك عليّه…
باجر أكبر…
أكبر أكبر
وأذبح بصارم (علي) راس الفقر
ولا أخلي يعيش ببلادي فقير
ولا أخلي يعيش ببلادي فقير
……
حامد كعيد الجبوري
٣٠ / ك١ / ٢٠١٨م
