السيمر موقع عراقي مستقل
السيمر / فيينا / الاحد 19 . 04 . 2020
حامد گعيد الجبوري
الشاعر العراقي غزوان فيصل
كل شجره :
كل شجره اسئلت عنك…
…البستان
…الحراس
وارد هدومي بس تراب
انكتهه بشليل الماي
اريد ابني جواب الناس
انام وتمطر سوالف
واتبلل حجي وضحكات
يواهس تشبه الوهواس
شحلاتك من تجي ببالي
…يصبحيه
كعدنا بعتبه طيوفك
ذبلنا السهر والكاس
وين الكاك…
ظهريه الشمس صعدت على جتافي
وانه معيدي غشيم بنص الولايه
درابينك جمر تنداس
حافي والجمر ينداس
واتنفس هوى البيبان
يانسمة هوى بارد تطك بالراس
غشيم وكمت ادك حيطان
يهلبت تسمع جفوفي
يهلبت من احط روحي على الحيطان
تسمع كل حجي بروحي
واسولف قصتي للكناس
يهلبت شاف خطواتك
بخطواتك ندى من تفوت
ولاشافك احد رديت
اسولف قصتك لروحي
نيشان الشمس بالراس
…
…… الى القطعه الاشد حراره في الشمس
{كريم منصور}
صوتك حمامه من المجر عبرت على الكيعان بعيون السلف
والشوك مو مثل المضه الشوك اختلف
صوتك اثر ظل بالنفس
يمسح تجاعيد الحرب ويشيل من عدهه السرف
صوتك ابنيه امكحله باول كحل
والعرس باجر من يجي يحني الرجل
والبرد مربينه جرح
طيبنه مر بينه دفو
غني اعله باجر ياترف
البس تعالو استهلكت كلهم اجو
وشلون جيه من اجو
لافاد وياهم شعر ولافاد وياهم غنه
مستحسف الكاسيت ضميته انه
مستحسف امي وخوفهه
حركت اوراق المدرسه
وتكلي جوز من الكفر
بتنورنه يطيح الخبز
روح القصايد بالجمر
موشاعر التنور
بس يقرى شعر
وشرد انا اكلك عالاجو
وشلون اجو
شككو ثوبك ياوطن
ثوب الورد
وثوب القنابل فصلو
خلونه عالحيطان نتطشر جثث ومحد يلم
خلو ايتام بكل يتم
خلونه نبجي اعله الحرب
ومانفرح بطاري السلم
مشطنه دمك ياوطن
دمك سرح ماينلزم
يايمه ابوس جفوفج الحركت قصايدنه امس
يايمه ذوله استهتروا
كامويقسمون الشمس
الابنيه ردت من وكت
ماتحلم بليله عرس
صارت غروب ومااجه
المحبوب باحضان الحبس
لا ياكريم الصوت لاتغني بعد البس تعالو استهلكت كلهم اجو
وشلون جيه من اجو
يامن عساهم لااجو
يامن عساهم لااجو
….
وله ايضا
بعدني اعلى الدرب انتظر جيه شوك
الليل شكــــــــــد طويل يمهد لصبحه
يتيم الوعـــــــــــد بعدك فدوه لاتنساه
راســــــــــه اخلاف جفك محد يمسحه
ردتـــــــــك بس تجي نتعاتب انا وياك
مـــــــــــــــرات الجرح يتونس بملحه
ولاتهتم للاجــــــــــو والراحو من بعيد
اثرهم عــــــــــالدرب بجفوفنه نمسحه
البشفته غجر مــــــايستحي من الناس
جلمته حزام لبست عالخصــــــر وكحه
ولاتسمــــــــع جلمته باذنك بنات بيوت
الحجـــــي مثل الشرف مانكدر نصلحه
البــــــــدوي بخيمته مايسكت من الليل
اذا مـــــــــاعنده ضيف يسولف لجرحه
ولااتعـــــــــــــب عيونك خلهم يطيرون
المــــــــــــــــايملك جذر لاتحترم جنحه
جرب مـــــــــــد ايديك وصافح الشيطان
يترك بيهه نــــــــــــــار شتعتقد سبحه
مرجوحه انصبتلك فــــــــارغه وهزيت
فكرت احـــــــط طيفك بس خفت يصحه
0000
غزوان فيصل
الشاعر غزوان فيصل
مواليد بغداد ١٩٧٩ ساكن مدينه العماره
متزوج وله ٥ اطفال
عمل الأمين المالي لجمعيه الشعراء فرع ميسان
نائب رئيس أتحاد الشعراء الشعبيين
رئيس رابطه سحر القلم
رئيس رابطه روح الله
رئيس جمعية البيت العراقي للشعر الشعبي في ميسان
شارك في اغلب المهرجانات الوطنيه والحسينيه في بغداد والمحافظات وكذلك أغلب البرامج التلفزيونيه
