السيمر موقع عراقي مستقل
السيمر / الثلاثاء 22 . 03 . 2016
ناصر الثعالبي
لك ايها العظيم الذي كونتنا في 31 آذار
تكوين 1
لمْ شوكنا بوسة مطر للعطش
وغني ابفرح لو جنت بيدر حزنْ
هذا ربيعك جاي.. شايل ورد
بوس الورد والشوك بوسة مزن
حته الورد يفرح ابلمسة ندى!
والشوك من لمسة ندى هم يحن
لا تنتظر يومك يعاتب جرح
جرحك يضل ابفزته ممتحن
جدمك تسير ابدرب شايل شمس
تزرع ضوه لو ظلمه صار الوطن
اليوم …. ما ينطر امس مندفن!
والدنيا غفوه بكصر رفة رمش !
خليك بيها عشك ماي اوسفن
تكوين 2
مره شفت الكمر
باك من الشمس كذلة ضواها
ودفن سره ابشوك غيمه
وانتظر شوفة غواها
وخيط اجفوف الشعاع
كلاده حلوه ولبساها
الغيمه بوّسهه فرح اذار سكته
وخضرت ورده ابسماها
ونزعت اهدوم العليها
ابغيرة العمال فرحانه بنداها
وحمل كل عامل
على اجتافه صباها
وعمرت بزنود اهلها
النورت عزة عطاها
شوفها ابجية ضواها
اثنين وثمانين شمعه
سارت الكمره وراها
