السيمر موقع عراقي مستقل
السيمر / فيينا / الجمعة 16 . 12 . 2022
حيدر حسين سويري
ليش ما توصفني؟ كَالت
ليش ما تكتب غزل
شرد أوصفج؟ كَلت يمها
وأني ما خذني الخجل
لن كتبت هواي عنها
وما كفاني ولا كفاها
كل كلام الكَلته بيها
واني من فركَاها نار .. ومشتعل
كَلت ارضيها بكتابة
وامري للعز وجل
وأبدي شعري بوصف حاله
مثل شاعر وارتجل
شرد أوصفك؟
يلي شعرك ليل لو نجمه أفل
يا ترافت خدك المعجون بكريمة عسل
شرد أوصفك؟
والوصف محتار بيك ومنذهل
عوف طولك عوف عينك عوف ايدك والرجل
عوف ذني
أدري بيهن شيء،
من سحر ودجل
انا أحب الروح بيهن
انا احبك وانت خايف في وجل
انا احبك وانت ترجف
والجفن منك سدل
انا أحب دموع عينك
وخزرتك لمن تصد ليه وتسل
انا احبك من تدير العين عني
وتبتسم فرحان من كلمة يول
ليش هيج تسوي بيه
ترضى ساعة وتقضي ساعات بزعل ؟
حلوة هيه الجا مني
وحيل حلوة
منك حجاية عجل
9/ 11 /2022
